MAJI MAJI集食行樂 平日的日與夜
去台北前做咗少少資料搜集，知道之前嘅花博園區，經庾澄慶哥哥有份規劃後變咗做一個集美食、市集、音樂、藝術等等於一身嘅空間，叫MAJI MAJI集食行樂。既然有市集，之前又未去過，睇相又好似幾靚咁，當然就加插咗入我今次嘅行程之中啦~
從圓山捷運站出來，步行唔使五分鐘，就會去到呢個見到大大隻字寫住MAJI MAJI集食行樂嘅入口位。
入口處嘅右手邊，就會見到凡係去親啲文藝地方都例必見到嘅好丘 (成個trip起碼見到4次以上)
同埋仲有神農市場，有餐廳，超市同埋cafe部份。
經過咗小食街一路行入去，有一個用嚟殺菲林用嘅旋轉木馬。
木馬隔離就係市集部份喇~ 因為當日我太早去到，係平日嘅11點幾左右，所以市集部份仲未開檔。所以只好安排夜晚再嚟過啦~
無市集行都要食飯嘅，我呢D有港女基因嘅，就緊係揀間坐得舒舒服服嘅cafe慢慢食!
而我開餐嘅同時，見到窗外嘅小食街有老師帶住一大班小學生搵位開餐。將原本無乜人嘅座位，突然fill滿晒咁濟。
食完就bye bye, 夜晚再嚟過~
晚上嘅MAJI 喺燈光襯托之下，感覺好似靚啲。不過原來即使到咗夜晚，平日嘅MAJI都係無乜人去的......
旋轉木馬喺亮燈之後，更殺菲林。
今次個市集終於全部都開晒門喇~ 不過就真係無乜人.... 唔知到weekend係咪會好唔同嘅呢~
行到最尾部份，有個被燈樹包圍住嘅水池，喺燈光映照之下真係好靚~~
而去到最最最尾嘅部份，就會係一啲比較高檔次嘅餐廳。
其實MAJI MAJI集食行樂，真係集晒小食、正餐、市集、悠閒地方於一身。現場亦唔太見有吉舖，所以我諗嗰度嘅人流應該唔係日日都係得咁少人嘅。如果想悠悠閒閒咁去兜返轉，平日過去確係唔錯。不過印象中weedend或者假日好似係有活動搞的，所以嗰啲時間去應該就可以見到比較熱鬧嘅場面。
台灣體驗系列：http://www.handsmore.com/tags/台北2015