冷門手作不太冷

分享:
  • 發佈於: 2 March 2016
  • by admin

這陣子趁Handsmore的大搞作正式見得人之前,繼續努力地入店舖資料。雖然要自己親手一筆一筆地將店舖資料入進database, 看似係一件非常愚蠢兼沈悶嘅事。不過正因為係一筆一筆咁入,我先有機會去了解每間店舖其實佢哋係做乜東東。每當見到獨特嘅作品或者特別嘅手作課程時,我都忍唔住喺度煲佢哋嘅資料,所以花在收集同處理資料嘅時間可能會多咗,不過可以樂在其中呢點好重要,咁先可以有動力一直努力去做下去。

喺開始整埋店舖資料前,原本仲以為香港好似無乜手作店舖,係參與手作市集嘅手作人比較多啫,要整理店舖嗰部份應該可以好快搞掂。不過.... 慢慢地我發覺我完全低估咗香港手作店舖嘅數量。手作店舖/ 工作室嘅數量,好似永遠入不完般,每當清完一批資料,好快又會發掘到另一批新嘅要入。你可能會認為香港明明係藥房金舖多啫,邊有咁多手作店舖呀?你平日出街見唔到唔代表無,因為佢哋大多係樓上舖或者隱身於工廈之內,要搵佢哋,真係要登門拜訪,並唔係隨便行行下街撞入去的。

而夠冷門嘅手作類別,好似金工同木工,我一直以為香港無得玩,係台灣先有。不過我發覺香港原來都有教呢兩門工藝嘅人, 而且仲唔止得一兩間。雖然佢哋嘅工作室可能無台灣咁大,不過佢哋嘅專業程度同捧場客都絕對唔比台灣嘅遜色,係我自己少見多怪啫.........  而做木工嘅選擇,更由傳統老師傅於充滿歷史味道嘅店舖任教,到一間很有規模、擁有很多大型機器輔助嘅工作室都有。每間都好想去,好想去晒學晒佢哋嘅課程呢~ (但唔好誤會,我絕對唔係為咗打卡)

雖然現階段嘅手作品牌database嘅資料未叫得上係完整,但我肯定佢係令你最容易搜尋、理解及發掘香港手作店舖分佈嘅搜尋器。其實要令Handsmore變得完整,係有賴各位協助參與,如果你哋有手作品牌嘅資料想提供,不妨到資料收集頁面提交俾我哋。Thanks~~

相關連結

資料收集頁面:http://www.handsmore.com/brand/data-collection

金工店舖資料:http://www.handsmore.com/tags/金工

木工店舖資料:http://www.handsmore.com/diy-category/木工

手作品牌搜尋器:http://www.handsmore.com/brand 

分享: