迷你織布機

分享:
  • 發佈於: 12 February 2016
  • by admin

早前行街時居然意外地發現有clover嘅迷你織布機賣,你知啦,香港地係好難會遇著有呢類產品賣架嘛。而以之前見過嘅織布機嚟計,呢部真係好的骰,好容易收藏。所以當然即刻入貨。

趁過年期間比較得閒,所以就試玩咗呢個新玩具喇~

Mini Loom入面包括咗兩張日文說明書、織布機嘅主體、穿線用嘅梭子、穿線用嘅針、梳。

將線繞好喺織布機上,再將呢一組線繞好喺個梭子上,咁就準備可以開始了。

不過我發覺黑色粗冷繞得太多圈好難穿過,所以最後我都減少咗啲。最初以為粗冷效果會好啲,點知出到來粗冷遮晒紅色條冷,淨係見到黑色一大片,效果麻麻。

於是乎我又轉埋用紅色冷,係睇得清楚啲線嘅走位,不過"紅紅配"好似無乜睇頭。

於是乎我又轉咗用金線,不過金線太幼,有排織,所以我織咗幾行,出到隻色之後又轉咗用白色冷。

白色冷同紅色冷嘅粗度相若,但我發現原來直嗰條紅線原來係點都睇唔係幾到架!

以下係每織完一行,要用梳梳返落去個step:

而去到最後幾行時,因為個位太窄,就要用返支幼身啲嘅"針"去穿:

織滿晒後就可以直接拆佢出來:

經整理後最後嘅模樣:

因為係隨手拎起現有嘅冷去試,所以啲色襯出來效果好似有啲老土..... 不過個mini loom其實都真係幾好用,又易收藏。因為係膠製,又唔會好似我以前用過嘅木製loom咁會磨到啲毛冷起毛。但要注意返嘅係,呢個mini loom只可以織出一個size嘅織物出來。至於呢塊嘢到底可以做到啲乜?咁就要留返俾大家發揮你哋嘅創意喇。而我就已經諗到織兩片出來拼埋,加條索線做個索袋又得,加粒鈕做個袋仔出來亦得。將來有機會真係做到出來時,再同大家分享啦~

分享: