親手造的鞋子

分享:
  • 發佈於: 10 January 2016
  • by admin

喺今時今日嘅社會,相信大家會覺得做孩子會比造鞋子更加容易。當幾十蚊都可以買到一對鞋嘅時候,要花過千蚊去自己做一對出嚟,好似係一件好傻嘅事。不過難得有人願意去教,你想學又有機會去學,咁點解唔去學呢?唔通又要等到,教造鞋嘅不能再以教鞋為生,當無人再去教時先來齊齊緬懷過去?

其實當我見到鞋藝工館嘅課堂時,真係覺得好吸引。畢竟喺現今社會,當一對鞋可以垂手可得嘅時候,又有邊個會關心一對鞋係點做出嚟?不過見到原來呢樣嘢都可以學嘅時候,我就真係好好奇佢嘅製作過程。個課程係有D貴嘅,所以我都掙扎咗好幾個月先決定去學。不過真係好特別,所以最後都係忍唔住報咗名。

我今次學嘅係Slip On's Flats Shoe Making (Beginners),算係最初級嘅課程之一。一共要去學兩個下午,我就係連續星期六日咁去學。星期六做到一半嘅作品,就可以放喺佢哋工作室,等第二日繼續進行。

雖然分咗兩日學,但個課程係超級緊湊,連影相嘅時間都無。一去到可以喺佢哋兩排皮之中挑選今次做鞋會用到嘅,可以揀兩隻色,但兩塊皮嘅厚度要差唔多先得。揀完皮之後就可以開工,基本上所有材料都已經包晒,放定喺位度等你嚟,真係只需要帶個人去就已經可以上堂。

成個課程會包括剪皮縫皮,如果有D需要用到工業衣車去縫嘅話,老師係會幫你代勞的。

第一日就係做到呢個步驟 (見下圖)。望落好似簡簡單單幾塊皮縫埋咁,但其實要做到呢個初步鞋型都絕不簡單。內面其實都有塊皮,所以內外其實都要同時兼顧。而成個鞋型,如果位置稍有少少唔對稱,出嚟都唔見得人架喇~ 所以真係要好小心對到齊。

唔好以為只係爭個鞋底,第二日就會好易好快做好,但其實唔係,之後仲好多嘢要做。我哋要將呢個半成型嘅皮套落個鞋模度,用釘固定。塗好膠水之後就要開始拉皮。呢個步驟最考功夫,D彎位摺位真係好難搞,同埋因為不斷係用膠水固定,所以膠水一乾,就好難再重來,因為一拉返出嚟就有機會整爛。貼好固定後仲要剪走多餘嘅皮,先可以做到以下咁嘅樣。而第一次做就可以做到咁,諗落個老師都真係幾勁。因為自己做到之餘,仲教到其他人都做到,咁先最勁~~

而膠水乾咗之後,就要拔返之前定位嗰幾口釘出來。不過... 我拔時... 唔小心... 有一支釘斷咗。個釘頭甩咗出來,個釘尾仲藏咗喺對鞋入面。呢個時候.... 當然係搵老師求助。而每當去到呢d位,就真係好佩服D老師,因為佢哋總有辦法處理好我哋意外所做成嘅問題 (幾乎所有課程嘅老師都有呢個能力)。而去到最後,當然就係貼埋個鞋底啦,個鞋底都要塗幾層黃膠先得架。而經過兩日嘅努力之後,一對親手製嘅平底鞋終於就誕生喇~~~ 真係好靚呀~~~~ 

(細心嘅你喺呢幅相中,可能會見到巴士仔。無錯,佢真係巴士仔。因為個課程實在太趕,整完都無時間好好即時幫成品拍照,咪唯有走時撘車嗰陣影啦~ 估唔到喺巴士上影都影得幾靚喎,haha~~)

 

課程資料

品牌:鞋藝工館

Workshop資料:http://shoeartistry.info/workshops/

文中的課程:http://shoeartistry.info/shop/slipons/

分享: