草山金工 - 親手打造一對純銀手鐲

分享:
  • 發佈於: 5 January 2016
  • by Kristin@Handsmore

今趟去台灣,最特別亦最期待之處,就係會喺台灣上手作課。而第一課就係去草山金工(天母店)度整金工手鐲。其實論方便程度的話,草山金工喺誠品松菸店及京站店係方便好多。不過一場嚟到台灣,當然想揀間環境最好嘅去感受台灣嘅手作文化嘛! 所以呢,最後都係寧願去遠少少,揀咗天母本店去上我呢一課。見到間舖之後,亦令我覺得無選擇錯,因為真係好有workshop氣氛 (其實你知唔知自己講緊乜嘅呢....)~

而去到確認咗我之前己經預約好今日做嘅款式(迴旋銀銅手鐲 x 2)之後,就有熱茶奉上,而且係會不斷幫你添飲。另一邊嘅架子上亦有餅乾供應,老師開始前會提醒各位肚餓時可自由取吃。台灣嘅workshop真係令人感到好窩心,好有人情味呀~ 我喺香港上咁多workshop, 好似連杯水都未飲過......

 

呢個就係我今日工作嘅位置,設備好齊全。同場另外仲有4個同學仔係學做介子,因為得我一個做手鐲,仲要係做兩隻,所以完咗開頭教點樣打字嘅部份之後,老師就單對單咁再教我。

因為老師怕我哋未掌握到打字嘅技術,所以每人會獲發一片金屬片去練習打字,打好之後老師睇完會再comment。

而呢兩條就係陪咗我玩成日嘅銀條,一粗一幼,分別係屬於兩隻唔同手鐲嘅。因為我實在有太多字想打,一條銀條有4面,我D字打咗3面,有一面仲要真係由頭打到落尾。而家數返,我一隻鐲上面打咗成80粒字,兩隻即係打咗160字。打落粗D嗰隻鐲上已經好難,到打落幼身嗰隻鐲上時,真係差少少都已經會出界睇唔晒隻字,所以真係要勁專心打。

而因為金屬本身係好堅硬嘅,所以喺每一面打字之前,都要用火熗加熱再放返落水度冷卻,令到條金屬軟咗先可以打字落去。

下面呢個就係粗身手鐲嘅打字效果,D字都係啱啱fit咋,可想而知打幼嗰隻係咪會打到癲先~~

由天光做到天黑,其他同學都走晒,但我都仲未做好。

而打好字之後,就會將手鐲彎成C字型,之後仲要打磨拋光。不過之後嘅步驟一直在忙,所以都無乜點影到相lu。而以下就係最後一個拋光步驟,我就只需坐定定等我辛辛苦苦打造完成嘅手鐲"出爐"。

登登登凳~~~ 以下就係經過6小時努力完成嘅兩set手鐲~~~~ 金色嗰隻其實本身已經成形,只係需要打磨拋光。一金一銀兩隻拍埋一齊,真係好靚架! 而老師見我打完D字之後,仲問我係咪設計師來。我諗.... 佢咁講即係我都D字都算排得唔錯啦,哈哈~~  而做手作送俾人嘅話,最開心莫過於見到收禮人愛不釋手,周圍炫耀~  呢隻鐲就可以帶俾你呢份滿足感喇~

香港嘅朋友如果都想去草木金工整返隻手鐲或者介子的話,可以喺niceday度報名,因為我都係喺niceday度報,好方便的。不過niceday好似只係可以揀天母本店,如果想近返D市區,其實都可以選擇返其他分店。如果要我將我見過嘅分店排名嘅話,我會咁排:

論方便程度:京站店 > 誠品松菸店 > 天母本店

論氣氛環境:天母本店 > 誠品松菸店 > 京站店  (視乎你介唔介意俾路人望住你整)

所以都係隨自己喜好選擇。

當日我遇到嘅嗰個老師真係好好人,可能因為單對單嘅關係,雖然我國語麻麻,但仍然可以好輕鬆咁同佢慢慢聊天。因為想自己開一間金工嘅舖,所以佢就辭掉百貨公司嘅職位而來到這裹打工學習。向住夢想方向進發嘅人,就算呢一刻未成功,但已經閃閃發亮。又或者係我望住佢時,雙眼閃閃發亮啦,哈哈~~~

 

台灣體驗系列:http://www.handsmore.com/tags/台北2015

 

分享: