聖誔手作包

分享:
  • 發佈於: 22 December 2015
  • by admin

早前喺日本買咗一份價值680円(~HKD45),由Hamanaka出嘅聖誕羊毛氈材料包。返到香港喺Jusco Living Plaza居然又俾我見到Daiso嘅聖誕羊毛氈材料包,見到咁平,唔理整唔整得晒都買晒先算喇 (唔知其他愛好做手作嘅人會唔會都好似我咁嘅呢)~~

咁到底係咪真係一分錢一分貨,喺"十蚊店"買嘅嘢就一定無咁好呢? 今次就真係一個好好嘅機會比較一下喇~

先睇Jusco買嘅材料包,入面包咗說明書一份、羊毛、其他應用到嘅配件、羊毛氈用嘅針。而Hamanaka嘅材料包,都有齊說明書同材料。不過Hamanaka嘅說明書係只得日文,而Daiso嘅材料包就有日英對照。如果唔識日文嘅話,其實睇Daiso嘅說明書會比較易明白一啲。而且Daiso嘅材料包仲包埋針,Hamanaka係無架,所以平嘢未必一定無好。講到Daiso嘅材料包好似好過Hamanaka咁,咁係咪買Daiso嘅材料包仲好呀?咁又未必,因為Hamanaka嘅材料價值在於佢嘅優質羊毛。一拎上手已經feel到佢哋嘅分別。落手拮時,Daiso嗰隻拮極都會有好多毛碎飛咗出嚟,但Hamanaka嗰隻就唔會,摸落仲好舒服,好好拮添~

其實無論係Daiso定係Hamanaka做完出嚟之後,感覺都好靚架~ 不過以唔識日文嘅初學者嚟計,可以先買Daiso平D嘅手作包練習下先,因為佢哋嘅guideline寫得清楚D。而如果要追求成品嘅質素嘅話,咁就買Hamanaka嘅材料包會好D。

而另外喺Daiso買嘅聖誕串珠材料包,原本以為會好細路仔。不過串完出來其實都幾靚吖~ 佢哋用嘅珠質素都唔太差架~

最後來張大合照,好有聖誕氣氛呢~

 

類別: 
分享: