Completitor

分享:
  • 發佈於: 14 December 2014
  • by admin

其實個網站整得咁慢都有D驚架!最初覺得網上資料散亂,所以決定推出咗呢個喜愛手作嘅我所希望會有嘅平台。第一個超簡陋版本出街時都未發覺網上有同類型嘅網站出現。但唔知係咪因為當個人正式踏出咗隻腳入去呢個範疇之後留意多咗,今年嘅手作品牌同手作市集好似愈來愈多,而其他嘅網上手作平台又相繼出現。其實我腦入面仲有好多好多構思想整,但始終都要技術上嘅配合先可以整到出來。對於有正職又愛逛街瞓覺嘅我,時間上真係一個好大問題。唔好以為handsmore自從第一個版本出咗街之後就變咗棄嬰,其實唔係架。只係因為喺製作第一個版本之後,開始有好多新想法,想重新製作一個新版本出來。但又礙於我所想做到嘅,以我現在嘅知識未做到出來住,所以又要下苦功邊做邊進修。結果就係一個字 - "慢"

但放心啦,俗語都有云"有競爭先有進步"嘛~ 面對愈來愈多類型相似嘅網站,我又邊敢太怠亂呢!我都怕我嘅idea到做到出來時,其他人都已經做咗,咁我又做咪可能多餘囉。我諗其他手作人都會明白呢種心情呢..... 又想懶但又怕慢吞吞到做到出來時都已經失咗優勢。所以大家一齊努力啦~ 因為有好多人都等緊我哋驚人嘅作品面世架,hahaha~

分享: